الاحلام الحقيقه وتحولاتها

انا قرات الموضوع ده على موقع تانى بس بجد عجبنى وقعدت اضحك مش لانه وحش او بيضحك بس بصراحه الموضوع واقعى جدا وهوه الى بيحصل فى اى شاب مصرى وحصل معايا بس لسه مكملش لانى لسه فى جامعه ومعرفش بكره فى ايه هههههههههههههههه
بجد لو قريت الموضوع وكنت مصرى هتضحك لما تقع على الارض اقرى وشوف بنفسك

احيانا بقعد افكر
وافكر فى التفاصيل الصغيرة اللى تولد عندى استنتاجات قليل لما بتغلط
(مش مرة بقى من نفسى افكر لازم اطلع حاجة حلوة )
وقعدت افكر مرة فى تفاصيل حياتنا :
- واحنا صغيرين كان يبقى لينا احلام كتيييييير اوى كلها احلام بريئة وساذجة
يعنى واحد نفسه يبقى زى بابا بيشتغل دكتور وواحدة زى ماما بتشتغل فى مدرسة مثلا
انا عن نفسى لما كنت بحلم وانا صغير كنت بحلم انى هبقى حاجة كبيرة اوى
كام متر يعنى - والناس كلها عارفنى والناس كلها بتيجى عشان اعملهم مصالحهم
كان نفسى ابقى مخرج سنمائى او رجل اعمال مشهور فى نفس الوقت ومع مرور الزمن واختلاطنا بالواقع بنبتدى نغير احلامنا تدريجينا
وكمان لما نبتدى نشوف مستوانا الدراسى هيألنا لأيه
ونبتدى ناخد اهداف اكتر واقعية من الاهداف الساذجة الجميلة دى
يعنى مثلا مع الوقت بقيت نفسى ابقى مخرج
وتطور الهدف واصبح مهندس
وبعدين دخلنا فى مرحلة فى غاية التعقيد
الا وهى الثانوية العامة طبعا انا مش عندى اى نيه انى اصعب الموضوع
بس هي اكيد نقطة تحول فى حياة كل منا
يعنى لو بصيط فى الطلبة فى اول سنه تانية تلاقى
-شعبة علمى علوم =طب او صيدلة
-شعبة علمى رياضة = هندسة وحاسبات
- شعبة ادبى = السن وسياسية واقتصاد
تعالى بعد نتيجة تانية
كله عايز تجارة وحقوق و ده لو الواحد مفكرش فى معهد فنى تجاري
وده نتيجة انه اصطدم بواقع الثانية المرير
من صعوبة المواد والامتحانات وحاجات كتير
وما يمنعش ان فيه ناس بتعدى بضة وتخش طب وهندسة والسن
بس وبعدين خش الجامعة بقى مرحلة التهييس والخروج والفسح
وال.......احم ما علينا
وطبعا بقى الاحلام السعيدة بعد التخرج
او مثلا لو واحد وواحدة بيحبوا بعض تلاقيهم بيحلموا بالجواز بعد التخرج مباشرة
مش فاهم ازاى
بس لما يطلعوا يصدموا بواقع البطالة والواسطة
وطبعا بنهاية قصة حب ساذجة وبريئة
وبعدين الاحلام بتتحول لشئ واحد
شغل - شقة - جواز
هما تلاتة
وبعد كدا تربية العيال
وبعد كدا بنتحول من ناس كان ليها طموحات وهدف لناس
عاديين جدا عايزين نعيش وماشين جنب الحيط
الواقع بتاعنا قتل كل امل وطموح فينا
وقتل حتى روح التميز والابتكار والابداع
وده اللى بيخلينا طول عمرنا محلك سر ومش بنتحرك فى اى حاجة
نادرا لما بيطلع منا ناس قدرت تقهر كل الظروف دى
وتميزت وبقى ليها وضع
وطبعا بعد ما الدولة الكريمة حاولت بأقصى جهد انها تحطمه
وده اللى بيخليهم يهربوا لبرة ويدوهم العلم هناك
عشان هناك فى ناس بتقدر
يمكن هما مخططين اننا نكون كدة
بس هل معنى كدة اننا هنفضل مكتفين كدة
هل ياترى ناخدها من قاصرها ونقتل الامل من دلوقتى عشان نخلص
مش عارف !!
بس لازم يكون فيه حل
احنا كجيل كلنا امل وحياة
وولسه الدنيا مش خبطت فينا
ياترى نخطط لحياتنا ازاى بأمل واحلام مصيرها الفناء
ولا نكون واقعين اكتر
ونبقى مجرد :
دكتور عادى ومهندس عادى وموظف عادى ومدرس عادى ؟؟
عادى وخلاص
ونسكت ونقول خلاص
ولا نعمل ايه ؟؟