يـماي القلب إسقيني عطش أروي به اللهفه
ضلوعي حيل ظميانه تبي تشرب من أنفاسك
حبيبي والصبر يبكي وعيّـا ينطـر الصدفـه
لأن الصبر يا كلي تعب في كونـه متماسـك
مطر يهطل بأشواقي على صحرا من الرهفه
يبلل سنديان الحب بقطراتـه علـى يباسـك
وهذي روحي تعزف لك نشيد الحب والعفـه
يردد بعدها نبضك إلامـن دقـت أجراسـك
حبيبي عطني أتلذذ أبي مـن عشقنـا رشفـه
تغرقني بحنينـي لـك تضيعنـي بأعراسـك
أحبك يا بعد كلي كثر جرحي، كثـر نزفـه
أحبك كلمه تتمايل على سطوري وبأقواسـك
أحبك غنوه غناها فـؤادي والصـدى خلفـه
وقال أرجوك لا تنسى تخط اسمي بكراسـك
أنا ناي ٍ يدور له عن إذن ٍ تطـرب لعزفـه
أنا الميته عطش وأسقي كؤوسي لجل جلاسك
أنا أتلو شعري وآسبـح بحمـد الله وبلطفـه
وأتعوذ من الغربه قبـل لا يغلـب نعاسـك
يـصورة استوائيـه بهـا الأعشـاب ملتفـه
على لون الظلام اللي يعانـد فيـه نبراسـك
رجولة هالبروق تبان من أقدامك إلى النسفـه
وأنا من هالسحب فيني أنوثه تكتسـح باسـك
حبيبي رتل أشواقك بلا أي خوف أو رجفـه
وأنا بشرح معانيها لأهلي .. ناسـي وناسـك
بنتيمم بطعـم الطهـر والمشمـوم والقرفـه
وبنصلي صلاة الحب أنا وانتا ورى الناسـك
بوقظ كل حواسي لك بصحيهـا بكـل خفـه
ياصوت الموج بالمحار عساني فدوه لراسك
حبيبي مد لي يدّك وهاك القلب خـذ نصفـه
وعطني نصفه الثاني عشان آعيش هوجاسك
أنا أتعاطى دوى حبك بلا معاين ولا وصفـه
وأشرب كاسي المليان بدمعي من بعد كاسـك
حبيبي بسكر بشوقي وأخلي حبي لك حرفـه
عساني فدوه لقلبك وعينك .. ضحكة ألماسك